කතන්දරකාරයෝ -kathandarakarayo

ELEVEN STORIES FOR BOYS AND GIRLS

නිකොලොයි නොසොව්

නිකොලායි නොසොව් උපත ලැබුයේ 1908, යුක්‍රේනයේ කිව් නුවරදී ය. නළු වෘත්තියේ යෙදුණු ඔහුගේ දුප්පත් පියාට සිය දරුවන්ට නිසි අධ්‍යාපනයක් ලබා දෙන්නට තරම් වත්කමක් තිබුණේ නැත. ඉතින් වයස අවුරුදු දහ හතරක් වූ තැන නොසොව්ට අධ්‍යාපන කටයුතු අතහැර රැකියාවක් සොයා ගන්නට සිදු විය. නමුත් හේ ස්වයං අධ්‍යයනයේ යෙදුණේය. ඒ නිසාම ඔහුට කිව් නුවර තිබුණු කලාවට සම්බන්ධ අධ්‍යාපන ආයතනයකට ඇතුළත් වීමේ විභාගය සමත් විය හැකි වුණි. ඒ ඔහුගේ වයස දහ නවය වන විටදී ය. එහි දෙවසරක් ඉගෙනගත් ඔහු, ඒ කාලයට අනුව අලුත් විෂය පථයක් වූ ඔහු වඩාත් කැමති වූ සිනමාව සම්බන්ධ අධ්‍යයනයට පිවිසුණේය. ඒ අනුව හේ මොස්කව් හි පිහිටි සිනමා වේදය සඳහා වූ අධ්‍යාපන ආයතනයකට සම්බන්ධ වූයේය.

එහි දී ඔහු සාමාන්‍ය ශිෂ්‍යයෙකු ලෙස ශිෂ්‍යාධාර වලින් යැපෙමින්. පාසැල් නේවාසිකාගාරයේ රැඳෙමින්, පාසැලෙන් ලබා දෙන ආහාර ගනිමින්, ඒ අතර දේශන වලට සහභාගී වෙමින් වඩාත් හොඳින් අධ්‍යාපනය හැදෑරුවේය.

සිනමාව ඔහුගේ සිත වඩාත් ඇද බැඳගත් විෂයයක් වූ බැවින් හේ එහි විවිධ අත්හදා බැලීම් කරමින් වඩාත් සාර්ථක නිර්මාණ බිහි කළේය. ඔහුගේ ජීවිතයෙන් වසර විස්සක් මුලුමනින්ම ගත වූයේ සිනමාව සමඟ ය. ඔහුගේ අනෙකුත් බොහෝ සිනමා නිර්මාණ මෙන්ම, දෙවන ලෝක යුද්ධයේ දී ඔහු තුළ යුධ වාර්තා වැඩසටහන් ද ඇගයීමට ලක් වුණි.

ඒ අතර හදිසියේම නොසොව් ලේඛන කලාවට පිවිසියේ ය. 1938 දී ඔහු මුලින් ම ලීවේ ළමා කෙටිකතා ය. ඒවා ළමා සඟරාවල පළවුණි.

එතැන් පටන් හේ ළමා කෙටිකතා පමණක් නොව ළමා නවකතා ද විශාල සංඛ්‍යාවක් ලියා පල කළේය. ඒවායෙන් බොහොමයකට රාජ්‍ය සම්මාන පවා හිමි විය.

සෝවියට් රුසියානු දරුවන් අතර නිකොලායි නොසොව් වඩාත් ප්‍රචලිත වූයේ හාස්‍යජනක කතා නිර්මාණයේ රජු ලෙස ය. ඔහුගේ කතා ඇත්තෙන් ම රසවත්ය. හාස්‍යය මුසු තැන් එමට හමු වේ. ඉතාම නිර්ව්‍යාජ, එසේම හොඳටම වැරදි කරන දරුවන් ඔහුගේ සෑම කතාවකම දැක ගත හැකිය. එම වැරදි මතින් ලබා ගන්නා අත්දැකීමෙන් ම නිවැරදි වන ඒ චරිත පාඨක දරුවන්ට වඩාත් ම සමීප වනුයේ සෑම දරුවෙකු තුළම එවන් චරිතයක සෙවණැලි තිබෙන බැවිනි.

ඉතින් එන්න, නිකොලායි නොසොව් ලියූ මේ පොතෙහි ඔබට එසේ සමීප වන චරිත තිබෙනවාදැයි බලන්න.