කදුකරයේ විරු දරුවෝ -kadukaraye viru daruwo

මෙය ඔස්ට්‍රේලියානු ලේඛකයෙකු වන Ivan Southall විසින් රචනා කරන ලද HILLS END කෘතියේ සිංහල පරිවර්තනයයි.

1921 වර්ෂයේ උපත ලද Ivan Southall ලේඛකයෙකු ලෙස මුල් අඩිතාලම දැමුවේ දාසය හැවිරිදි වියේදී Mellbourn Herald පුවත්පතට ලිවීමෙනි. එවකට ඔහු විසින් ලියන ලද කතා තිහක් හා ලිපි විශේෂාංග රට පුරා ජනප්‍රියත්වයට පත්වූයේ මෙම පුවත්පතමාර්ගයෙනි. දෙවැනි ලෝක යුද සමයේ ඔස්ට්‍රේලියානු ගුවන් හමුදාවට එක්ව කටයුතු කළ ඔහු පසුකාලීනව සිය රටේ මෙන්ම ලොව පුරාද ජනප්‍රියත්වයට පත්වන්නේ ලේඛකයෙකු වශයෙනි. යොවුන් දරුවන් උදෙසා වැඩි වශයෙන් නිර්මාණය වූ ඔහුගේ කෘතීන් ලොව පුරා විවිධ භාෂාවන්ට පරිවර්තනය වී තිබේ.

HILLS END නම් මෙම කෘතියට පසුබිම් වන්නේ එකල ඔහු විසූ කඳු වලින් වට වූ දුෂ්කර ගම්මානය හා ඔහුගේ ළමා වියේ මිතුරු මිතුරියන්ය.

මෙම කැලෑබඳ ගම්මානයේ විසූ දරුවන් පිරිසක් වැඩිහිටියන් නොමැතිව ගමේ තනි වූ එක්තරා දිනයක මුහුණ දුන් බිහිසුණු අත්දැකීමක් ලෙසින් මෙම කතාව ගොඩනැඟී තිබේ.

පෝල් හා එඩ්රියන් නම් දහතුන් හැවිරිදි වියෙහි පසු වූ දරුවන් දෙදෙනා මෙම ළමුන් පිරිසට නායකත්වය දී අන්තරායකාරි අවස්ථාවක කටයුතු කළ අන්දම ගැන විසල් කතාන්දරයක් අපට කියා දේ. ත්‍රාසය, භීතිය හා වීරත්වය මෙන්ම සාමූහිකත්වය පිළිබඳව ළමුන්ට අගනා පාඩමක් කියාදෙන මෙම නිර්මාණය යොවුන් වියේ පසුවන දරුවන් උදෙසා ලියැවුණු අගනා කතාවකි. වර්තමානයේ දියුණු රටක් සේ සැලකෙන ඔස්ට්‍රේලියාවේ මුල් පදිංචිකරුවන් ගෙවූ දුෂ්කර ජීවිතය පිළිබද යම් අදහසක් මෙම කතාව තුළින් අපට ගත හැකිය.